Studente wat aanvaar is vir 2011!

Target Life is nie ’n ekstreme avontuurkursus nie en daarom sal elke gewone mens dit kan meemaak en geniet. Ons is immers  genoodsaak om “couch potatoes” te waarsku om aktief te begin raak, aangesien ’n aangename ervaring baie swaar kan raak vir mense wat nie ‘n aktiewe leefstyl handhaaf nie. Meeste uitdagings in die kursus is emosioneel van aard en wanneer jy deur “issues” werk mag dit dalk nie so lekker voel nie, maar die uiteinde is altyd baie goed. Sonder selfdissipline sal mens niks in die lewe kan bereik wat die moeite werd is nie en daarom sal daar tye wees wat jy sal moet deurdruk en uithou. Klastye is nie onderhandelbaar nie en al is jy moeg sal jy daar moet wees en moet deelneem aan elke aanbieding, of jy daarvan hou of nie. Dis vir ons belangrik dat ons studente ’n ruggraad ontwikkel voordat hulle ’n universiteitsgraad gaan verwerf. Vir mense met ’n passie vir die lewe wat hou van redelike uitdagings is daar niks onaangenaams in ons kursus nie en hulle wil dikwels nie eers vakansies huis toe gaan nie. Baie van ons studente was spyt toe die Survivor (ons mees uitdagende kamp) klaarmaak, omdat hulle so baie daaruit kon kry vir hulleself. As jy bang is vir uitdagings, sal hierdie proses jou die selfvertroue gee om uitdagings te geniet.

Reëls - Ons hou nie van reëls nie, want dis iets wat een ou vir ’n ander maak wat nie vir homself kan dink nie. Indien jy positief is oor die proses en elke uitdaging vat, sal reëls vir jou nie eers ter sprake wees nie. Maar mense is mense en vang soms regtig dom goed aan. Target Life se reëls is daar om die proses en elke student individueel te beskerm en word jaarliks goed deurdink en hersien. Met 12 jaar se ondervinding weet ons al wat werk. Download  die reëls (kontrak) en maak seker dat jy verstaan waaroor dit gaan, ons gaan nie daarop kompromeer nie. Jy sal opmerk dat daar meer aandag gegee word aan die rede vir die reëls, as aan die reëls self. “Where purpose is not known, abuse is inevitible” – Dr Myles Munroe

Wanneer begin ons? - Die studente ontvangs vind by Brummeria kampus plaas op Vrydag 14 Januarie 2011 om 16:00(registrasie) en 17:30(Inligtingsessie vir ouers en studente). Tydens die geleentheid sal finale administrasie afgehandel word en ’n inligtingsessie vir die ouers plaasvind, asook geleentheid vir enige vrae wat daar nog mag wees. Onthou om die getekende ‘kontrak’ saam te bring en bewyse van inbetaling van jou registrasiegelde, indien ons dit nog nie het nie. Die ‘Kickstart’ kamp sal daarna ’n aanvang neem en ons sal terug wees by die verskillende kampusse teen Maandag middag 17:00. Jy moet dus jou kampgoed byderhand hê. Kommune studente kan al van Vrydag oggend af intrek en hulleself tuis maak daar.  

Kick Start kamp: Wat om saam te neem

Wat jy moet saamneem:

’n ‘Great’ gesindheid

1 Stel baie ou klere

3 Stelle gemaklike klere vir 3 dae

Warm klere, Slaapklere

Swemklere en sonbrandgoed

Badkamersakkie

Slaapsak en kussing

’n Skryfding en jou Bybel.

Wat jy nie moet saamneem nie:

Laat jou selfoon en MP3 player by die huis vir hierdie kamp. Dit sal jou ma daaraan herinner dat jy nou groot is en jou eie ding gaan begin doen. Jy hoef nie eetgerei te bring nie!